分別公乸篇

一般爆到蝦的話都會去分別公乸, 為求將無咁靚既公挑出, 留番D靚公去打種, 因為大部份生出黎既蝦B會似爸爸多D, 但係初學者就未必會識分, 今日趁得閒就畫左個比例圖給大家分享一下.

公:---
1) 向天觸鬚較長, 這是最為明顯及比較肯定的特徵
2) 頭頂比較平, 很少會拱起, 但也有例外
3) 頭形比較幼長和窄
4) 第二塊甲較窄和甲身較矮
5) 喉糖蝦公既腳會比較遲出紅腳, 於幼蝦時會比較淡紅

乸:---
1) 向天觸鬚較短，通常比起頭的長度還要短少少
2) 頭頂比較拱起, 在幼蝦時會比較多用此特徵和紅不紅腳來分別，因為其他幾項未必會易分得出
3) 頭形比較粗短和闊身
4) 成蝦時第二塊甲下半部份會變闊變圓, 俗稱波板甲, 甲身較高
5) 幼蝦時會比較紅

其實最好分別公既時候就係當飛緊蝦果時，公隻爪會一路爪下爪下咁飛, 果隻就9成係公，如果要分乸就緊係挑有抱卵果D啦，哈哈……鬼唔知亞媽係女人咩！

久被遺棄的細缸

今日望下個14寸細缸，原來D絲藻又爆得好勁，用手清咁D之後影番幾張相同大家update下先。

呢個缸番左缸三個幾月，用氣舉底抽直入背濾潛水泵上電子水冷回缸，呢個setting係搞盡腦汁咁諗出黎，因為無位放濾桶，所以唯有咁樣試下，雖然我已經做大左個後隔，放左6L monoball，結果NO3都係長期響20至30左右，但慶幸D蝦總算都叫做捱得住。

我係用呢個缸要黎玩溝蝦用，住客有以前養開既海老，錦蝦同新加既博多乸，佢地已經出左F2，而家仲放埋喉糖既淘汰公同埋淘汰B，好好玩！希望可以繼續挑，遲D出到D段段有既子代啦！

F1海老公

淘汰喉糖公

新入博多乸(已被喉糖公搞掂)

強者殞落

呢隻係我第一隻養得最長直至老死既蝦:…中年海老公，身長2.5cm，眼睛泛紅色，厚甲實白，紅腳，係響水記買，買時已經有1.5cm大，養左一年左右，估計是陽壽已盡，畢竟大約15個月應該有了，安慰是子代亦都唔少，因為佢曾經抱住隻飛蟻黎食，所以特別認得佢，果陣時都曾經當選過種公一號架，hehe.....

佢既case係退殼後，鬚再長不長，不願有太大既活動，大量減少進食，爬泥情況也少左，一星期後漸漸又出現頭頸部分有離殼情況，好似脫到最後一件底衫咁，露出蝦肉色既蝦肉，最終延至三天後既今日早上卒之瞓低左，所以藉此懷緬一下佢............

人工孵出

今天又有3隻蝦旦爆出，同佢地影相之餘順便影下D未出世既旦，點知影到隻蝦旦好搞笑，好似喺度同我揮手say hello咁. Hahaha....

孤初

話說抱卵靚媽走左之後，只有一隻B可以成功人工孚出，佢亞媽係抱左先入門既，果一批B唔見哂，第二輪抱抱下就瓜左，剩番呢隻九代單傳，一換一，同佢亞媽成個餅印，都係大頭蝦，希望會係公，長大成人！

爆哂卵

昨晚放工回家，見平頭裝卒之抱左，匿響欖仁葉下安胎，再望真D原來D卵多得滯，爭D唧左出黎，粗略估計有20粒起碼，現在還未到爆蝦期，點解D母蝦仲成日抱既（唔係曬命），唔通D糧真係咁有效？如果我証明到既話，會公布俾大家知，暫時賣個關子先，哈哈。。。

又殘左咯，陰公=_=”

平頭裝又抱了

昨晚無聊地看蝦，留意著早己爆哂膏同起哂事業線的一隻母蝦，我改左一個好貼刧既名俾佢叫“平頭裝“，雖然整體來說並不是靚蝦，但係個頭花就幾特別，副榢生都仲係幾新下，呢次應該係第二次，希望響大缸度生會生多D啦。

至於邊個係經手人就睇唔到喇，同D公蝦捉左成個鐘頭都捉唔到，唏！我要瞓架！

子代 & 純化

相信養蝦既朋友唯一既目的就係爆蝦, 想一代一代更加靚落去, 但係當你爆到蝦既時候都會有以下既煩勞, 就係發現出黎既蝦, 點解唔係隻隻都同老豆老母一樣嘅? 會走d 四圈, V仔, 虎牙出黎, 心裡面一定係對果兩公婆產生疑惑, 唔通我買呢隻蝦仲唔算頂級, 要買D更靚既先得! 其實個體既花紋係代代相傳, 所以出黎既子代都會有不同既花, 未必隻隻同父母一樣, 大多數人會每次生完一鬥裡面找出最靚既幾隻去繼續一路延續落去, 俗稱純化, 有高手話將靚既仔女大左之後再同父母搞一次就會仲純D添， 經過幾次的嚴格挑選之後, 最後出靚花既機會就會提升了, 但係另一個問題會出現, 就係近親相交既情況越來越嚴重, 出黎既蝦B活存率會越來越低, 又或會英年早逝, 想避免這情況出現, 其間最好是購買一些不同貨源既同系蝦(如果你只是養開一種蝦的話)去再去溝. 我而家係養不同品種既蝦, 應該無弱化既情況出現掛, 阿尼陀佛 ....

 

Cross mix party !

個人喜歡紅水晶蝦的程度需不至於瘋狂, 但自問也是一個狂熱份子，哈哈.....都唔知自己想講嘜，總之行親FS都會放低D，唔會只揀一個品種，只要睇得上眼，價錢又值既話都會買(大部份係實白既丸禁以上），但係絕大部份都係兩舊樓下貨仔， 即係響個大缸度尋寶果隻，不過都買過一對剛好四位數既中年海老, 揀到正既拎番屋企就會即時影張相留念，因為怕佢唔鍾意新環境，第二朝就死俾我睇.

有人響往純血，只養一個蝦種，而我就鐘意玩大兜亂，因為每種蝦都有各自既特點，如果純血實白血爪靚花，紅白分明既純種蝦, 往往要動輒昂貴金錢，更因為貨源唔多，有近親相交弱化基因既可能性，只要無白蝦基因，任何不同品種相交繁殖出黎既仔女就唔會有白蝦出現，但係源頭分散的話都有風險，就係出左白蝦就會唔知邊隻出事, 查實講到尾只係自己付擔唔起, 哈哈。。。。，再者生出黎既子代唔會有大驚喜, 因為同一個子代隻隻特徵都會差唔多，再打出黎既亦都會差唔多, 而不同品種mix出黎既B，因為你唔知佢地邊隻佬得左米先, 要睇住D B慢慢大先至知，吖！原來佢亞媽係邊個邊個, 佢老豆係邊個邊個，好好玩架。

我就喜歡以中年海老爲主，去溝不同品種,  因為中年海老人地話會大隻D(其實可能係傳聞），咁即係體格好D啦，以下係我所買過不同既蝦(多數係乸），有紅蜂，貴夫人，錦蝦，博多，漁夫之寶，遲D再post佢地既子代俾大家分享，睇下認唔認得出佢地係邊個品種既子代＾＾

拯救小孤初

母蝦不知是否因初次做媽媽關係，有產前抑鬱症，劈低12粒左右既BB蛋就走左，唯有挑那卵落蝦網仔度搵水吹住，希望佢地孚得到出黎啦！跟住第二日又死左隻生緊仔既靚媽, 一齊同期執行。

兩日後，靚媽既遺腹子卒之有隻誕生喇，其他有幾隻彈唔出焗瓜左。

分享第一次人工水晶蝦交配

因為在蝦店買蝦時看見抱卵的母蝦比沒有抱卵的貴很多，所以便埋下了這次配種行動既伏線，及後買了一隻自己心儀的母蝦，一個生仔兜，一支抱卵XX以便不時之需。

話說前幾日看到隻母蝦脫了殼後被一班公蝦追，爲數有5、6隻，當中不乏靚仔，但也有些是質素較差的甩色蝦公，這時眼見時機成熟便action, 把這隻母蝦和兩隻類似脫了殼，但無中招的母蝦一併撈入生仔兜內做陪嫁妹仔，再挑選兩隻接近見得人既公蝦做入幕之賓，又把浮萍放滿嚮面型做浪漫氣氛，起初兩隻公蝦不知是否後生得滯無經驗，經過10分鐘追逐後仍然不得要領，把心一橫便離兜一段距離唧了一下藥水，兩隻公蝦即時有明顯反應，追多了及虎虎生威，很快就成功騎上搞掂，跟住母蝦還一次過排了很多便便，更馬上即場婚娩生蛋，完滿的大團圓結局。希望看官們不要覺得在看漿糊小說便好了。。   哈哈。。。。。

強悍的他

身高2cm公蝦，無La La捉到隻飛蟻食，砌到眼都噴火呀！