蝦缸後勤員工(1)

除左養紅白水晶蝦之外，我仲養左其他生物，佢地主要係要黎清潔蝦缸同埋穩定水質，而家就介紹其中一位幕後功臣俾大家識:---
長戟紅鼻槍蝦: 40蚊一隻，可能你會話使唔使咁貴呀？無錯！真係咁貴！因為真係一定要係好長㦸同一定要好紅鼻，身體有閃光果隻先至得，如果一袋幾隻短鼻又無色既就唔多做野架喇！做咩？ 食絲藻囉，不過好睇蝦自己本身，有D真係好食懶非響度等食蝦糧架。

用鉗食意粉＾＾

回氣中

最近有點迷茫, 買左好多粒喉糖食都好似解唔到毒咁, 但畢竟已彈盡糧盡, 只好暫停入貨, 啜住手頭上既喉糖吊住命先, 噢!!!!  番啜都又幾好味喎, 現時 touch wood 仲係零死傷, 只有一隻"二號蝦乸“出左7隻子代, 係响漁夫度抱番黎, 而家果胎先至係自己隻公打既, 希望出黎既質素會更加好啦.

燈的色溫K數選擇

燈對於蝦缸既作用只是用來賞蝦, 除非你主力係種草, 否則帶白而光亮既照明系統是比較好, 而何謂帶白呢？普遍認為養水草是用6500k既燈，呢個k數係偏黃既。另外本人以前是養鹹水魚的，因爲迷上紅白水晶蝦及想挑戰下難道度，所以連以前養鹹水魚用的14000k投射燈也保留用黎養蝦，而呢個k數就係偏藍既。而家我再配一支9x3W既LED響前面，老細話係10000k左右，感覺光線好充足好舒服, 蝦也看起來也特別好白，而後開的細缸就用左養水草的燈，大約係7000k，看起蝦來也比較偏黃，大家看下面的相片就知道當中既分別，而這測試黎去推算蝦缸最適合既k數就應該係9000至11000k左右喇，買燈時要問清楚同記得帶張白紙去試，試下睇下光影週圍會散出咩顏色先至好買呀。

支燈中午影就白番D

氣泵與Co2應用

究竟蝦缸需唔需要用Co2? 答案係“唔需要"，因為Co2係要黎俾植物進行光合作用既，所以有正常偏多少少既打氣setting就已經足夠，但係如果有種水草又有養蝦呢？咁就要睇下你種左幾多草同養左幾多蝦喇.

打CO2可以有助植物生長，植物更可釋出氧氣給生物所需，沒有CO2補充，植物只可吸收水中現有有限的CO2，CO2是維持水中酸性既元素，CO2被植物吸收後，ph便會上升(變鹼)，這樣震蕩對蝦會影響較大，尤其是種左大量植物時，開燈後ph會驟升情況會較為明顯．以我90cm缸爲例: 種左扭葉蘭，虎紋椒，06撒旦，小欖仁各一棵，5稞椒榕，10幾條綠宮廷，一大條莫絲木，如果開燈唔開C02既時候，ph會由5.0升到去5.2X，所以現在調節5秒1泡既C02跟開燈同步，同時供給兩個缸用，要黎keep住ph響5.0左右（同未開燈前一樣），咁樣可以減少ph驟升驟降（關燈後又會由5.2X慢慢回復正常5.0）， 這樣會對蝦減少剌激，使蝦不會因為ph震蕩而加快脫殼進程，穩定蝦的正常生長發育。

至於氣泵打氣方面，常有人誤解是打氧氣， 其實打的都係空氣，空氣內含氧氣百分比只係好少（最多既係氮氣），所以打氣只係補充到好少好少既氧氣，亦同時補充了Co2同其他氣體，所以長期大打氣是有益無害的，反而如果打氣不足又種多草既話， 關燈後水草會進行呼吸作用，跟生物爭吸氧氣，蝦就有缺氧可能，對超養蝦缸內的弱蝦和剛剛脫売既蝦會做成傷亡，所以執蝦行動就會多數於早上進行，及多數會是軟殼蝦，就是因為這個原因, 祝各位Good Luck.......

人細鬼大

呢隻係上兩次入既漁夫幼蝦，只有1cm大，三麻呂，象牙黃色甲，禁入，未出紅腳。
尋晚有隻母蝦退殼，佢竟然學D大哥哥週圍飛！咁細隻就咁有天份？唔使急，日後大把機會架，hehe.....

日本增氧出水咀

見到一班蝦友近排有個新玩意玩，好似幾得意同埋效果唔錯添，所以星期二去豪哥度買蝦既時候順便買個試下，最初考慮到自己個濾桶出水好慢，效果可能無咁好，但係抱住人有我有既心態，所以最後都買左個番屋企玩，結果就係四個字“明顯弱雞“，噴出黎D泡只有維持10幾粒度，同埋更加令出水更慢，睇黎我呢個case就唔係咁適合喇，但係如果出水正常或者打緊大風既朋友就好有幫助嘅，見到其他蝦友既噴泡效果真係好好，直情可以慳番個氣頭添，值得推介.

升格避臭格

死蝦期的確係好難過的日子，想必很多師兄都搞盡腦汁去改善個缸，但係死傷都是在所難免，屈指一算今年死蝦期已經死了30隻蝦左右，綜合原因我諗係經常落雨，出太陽，落雨落雨，出太陽出太陽，影響水質變化所致，其次是天氣熱，水冷在兩度內每天上上落落，導致水溫不穩定令弱蝦頂唔順，所以就係咁先囉。

回正題先，我發覺之前死左既蝦同過往既結局唔同，就係會無蝦行埋去食佢，如果匿埋石後面或者睇唔到既地方，更加係直至死蝦發霉溶哂都唔知，唔通D蝦知道隻死蝦有病？所以唔食佢？有見及此，我就將D石全部升高一格，一來可以減少死水位，二來可以被D母蝦遮下光抖下，三來緊係最緊要減少盲眼位，唔好俾D蝦匿埋瓜左都唔見到. 避免病毒散播，Touch wood升起左之後就仲未見有x蝦，唔通真係咁有效？就有待跟進喇。

喉糖工廠

喉糖蝦確實係相當吸引，所以我早前已經轄出去，將現有的所有蝦搬到細缸，騰出90cm缸出黎淨係養喉糖，經過兩輪收購後，現在有兩公五母（基本爆蝦陣式）和四小蝦，已經有一母（膠蝦二號）生產左B出黎，跟住尋晚又見到佢再抱，其餘還有兩隻新母蝦抱緊，希望一路繼續，唔好俾佢停呀！＾＾

貴D都係要買佢

呢隻不銹鋼網花籃係我試過咁多隻之中最耐用既，魚街唔係好多間賣，價錢更加係常見既金屬圓蓋底既一倍，駁管咀口更加係有鏍絲牙和橡膠絲帽，初初攞上手都唔知點駁，但係又唔想再買普通果隻，因為已經買左N咁多個，個個都係用一排個點焊位就生銹，試過DB被扯入桶添。依家呢個用左大半年都好似新既一樣，言贊！

人工孵出

今天又有3隻蝦旦爆出，同佢地影相之餘順便影下D未出世既旦，點知影到隻蝦旦好搞笑，好似喺度同我揮手say hello咁. Hahaha....

小小大設置

這個看似好普通既水妖海棉，經過改動放在除油膜器上後就變成一個好有用的工具，集除油膜，養菌，直接添加硝化菌入濾桶於一身既用途，只要將入水既流量控制得宜就有唔錯既效果，當然係要確定到海棉係完全塞滿哂個口，避免到吸入蝦B就爲之very good 啦＾＾

一杯簡單的茶

新力軍已經加入振興喉糖缸大行動行列，今次入左兩公三母(兩抱)四小蝦，因為在下是在一衆蝦友由尾數上第三名抵達關係，好野已經被人揀左好多番屋企了，好在得到豪哥關照，兼且佢又知我既選擇..... 性取向，都留番到D俾我，如果唔係空手回都有之，真係好多謝哂你。

呢批除左有一貫既厚甲，紅腳表現之外，最重要係有我心愛既麻呂禁入，雖然係普通到唔普通，但係我既要求一向就係咁簡單. 你話特別靚又唔係，你話佢好普通又唔係，哈哈。。。我杯茶就係咁架喇，N N

水記天橋

因為以前第一次上水記睇蝦就俾佢果條弧形天橋吸引住，真係一見難忘，相信好多蝦友都會好似我一樣都想自己擁有一條，所以大缸番缸後就自己紮左一大條兩尺幾既莫絲木，正所謂靚木可遇不可求，雖然我呢條係比較直，但係放入我個14“深既缸都算合心水，初初只係揾D石浪住，不過就打斜遮住好多位，直至上星期終於找到一支啱size既三腳架，依家撐番高十足十條天橋咁，更增加了空間感，都算收貨啦，hehe.....

浮萍一線牽

尋晚同一班蝦友飯局後，原來有位新蝦友同住一區，所以就一齊去搭忘命小巴，車上順理成章同佢大談蝦經起來，講起有時浮萍被水冲下冲下飃黎飃去都幾靚幾優雅，又可以吸下NO3，好多蝦友都會放架，不過如果清唔切響缸前面揚下揚下都好阻住睇蝦，所以我就提議佢以下方法: 
用一條紮莫絲的幼魚絲綁響兩個吸盤度，然後吸響蝦缸內壁，高度以水面低少少爲佳，利用魚絲把浮萍管在水面後方，咁就唔會阻住賞蝦，更加話之佢爆到飛起啦，係咪？效果好好架，大家可以試試 ^ ^

人工孵化室設置

唉…近來有幾隻抱卵母蝦瓜左，由於之前幾次孵出成功率不高，所以要找出原因，綜合過往既經驗作出以下幾點改善

1)用橡筋固定魚網，最少兩個位置，以免誤碰倒走蝦卵。
2)利用水妖出水的含氧度高水流適量部份流入網內，令網內蝦卵有輕微活動爲準。
3)調較網口置於水面下1至2mm高度，讓孵出的蝦B可以自行游出

孤初

話說抱卵靚媽走左之後，只有一隻B可以成功人工孚出，佢亞媽係抱左先入門既，果一批B唔見哂，第二輪抱抱下就瓜左，剩番呢隻九代單傳，一換一，同佢亞媽成個餅印，都係大頭蝦，希望會係公，長大成人！