水冷的煩惱

相信香港地養蝦既朋友正常都會配有一個水冷機黎俾D蝦享受，響選擇方向面，大多數人會選擇祖國品牌，因為而家內地的生產技術已經追上其他國家，好多時外國牌子也是OEM俾大陸工廠去製造，所以海利，日生等品牌也遂漸被港人受落和普及。

不過價錢仍是高據不下，以本人當時初初學養蝦時黎講，真係好唔捨得，所以就響淘寶度摷，結果就買左兩部雜嘜水冷，都用到而家，但係部制冷片的就換過一次片，而部壓縮泵的就燒過兩次散熱風扇，不過我都唔捨得掉，原因不是我慳錢唔想買，而係地方所限呀！搞盡腦汁先至可以達成呢個圓蝦夢，所以我係唔會放棄架！

爆哂卵

昨晚放工回家，見平頭裝卒之抱左，匿響欖仁葉下安胎，再望真D原來D卵多得滯，爭D唧左出黎，粗略估計有20粒起碼，現在還未到爆蝦期，點解D母蝦仲成日抱既（唔係曬命），唔通D糧真係咁有效？如果我証明到既話，會公布俾大家知，暫時賣個關子先，哈哈。。。

又殘左咯，陰公=_=”

平頭裝又抱了

昨晚無聊地看蝦，留意著早己爆哂膏同起哂事業線的一隻母蝦，我改左一個好貼刧既名俾佢叫“平頭裝“，雖然整體來說並不是靚蝦，但係個頭花就幾特別，副榢生都仲係幾新下，呢次應該係第二次，希望響大缸度生會生多D啦。

至於邊個係經手人就睇唔到喇，同D公蝦捉左成個鐘頭都捉唔到，唏！我要瞓架！

吸B大法

有師兄想番缸，但係又怕捉大量既蝦B，分分鐘會捉成幾個鐘，其實呢次介紹既方法係上次番缸既時候發現既，係用亞加力5mm幼管加膠氣喉，用虹吸方法，先吸一下,  待有水流出後, 用手指公禁住條膠喉出水, 跟住就擺好支管嚮隻B頭殼頂, 越接近越好, 然後手指公一放, 隻B就會好似俾太空船黎接佢咁被帶到入桶內，吸完一隻就用手指禁實番個出水, 慢慢再去搵下一隻，大家有機會真係要試下，好好玩.... 又快，用個細細既膠桶裝住就得，蝦B會好安全，俾手指夾到既機會率係接近0， 對3mm或以下size合用.＾＾

註: 水桶要先吸有一兩吋水先至好開始吸B, 如果唔係就會撞瓜佢地架喇

子代 & 純化

相信養蝦既朋友唯一既目的就係爆蝦, 想一代一代更加靚落去, 但係當你爆到蝦既時候都會有以下既煩勞, 就係發現出黎既蝦, 點解唔係隻隻都同老豆老母一樣嘅? 會走d 四圈, V仔, 虎牙出黎, 心裡面一定係對果兩公婆產生疑惑, 唔通我買呢隻蝦仲唔算頂級, 要買D更靚既先得! 其實個體既花紋係代代相傳, 所以出黎既子代都會有不同既花, 未必隻隻同父母一樣, 大多數人會每次生完一鬥裡面找出最靚既幾隻去繼續一路延續落去, 俗稱純化, 有高手話將靚既仔女大左之後再同父母搞一次就會仲純D添， 經過幾次的嚴格挑選之後, 最後出靚花既機會就會提升了, 但係另一個問題會出現, 就係近親相交既情況越來越嚴重, 出黎既蝦B活存率會越來越低, 又或會英年早逝, 想避免這情況出現, 其間最好是購買一些不同貨源既同系蝦(如果你只是養開一種蝦的話)去再去溝. 我而家係養不同品種既蝦, 應該無弱化既情況出現掛, 阿尼陀佛 ....

 

死蝦期如何扭轉禿勢?

近來的死蝦期一路纏繞住個缸, 平均一個星期都有1-3隻, 雖然話生既比死既多就得以維持啫, 但係成日執起佢地果一刻都好心痛架, 尤其是又靚又同佢產生左感情果D蝦乸.

尋晚欣賞隻新靚乸之餘, 一路觀察D蝦既表現, 發覺好多都目光呆滯, 耐不耐先至爬兩下泥, 有好多更加好似入左定咁, 心想唔通遲D又要執起哂佢地?! 這時腦海番起以前的蝦球片段, 再想一下近期又好少餵佢地,  因為成蝦死剩4, 50隻左右唔想落過量, 平均三日先餵半粒白倉糧放嚮糧兜到俾佢地食, 但係尋晚索性順便餵埋微生物原素俾D蝦B食, 點知唔覺意落多左, 搞到成缸都係, 但係D成蝦大部都走左去爬泥執微生物原素食, 而唔去食好硬既白倉糧, 隻隻表現都好活潑, 爭到飛起! 同之前既就死樣真係差天共地, 呢一刻, 師傅明白了! 原來我缸D泥裡面無食物, 太DRY了, 所以佢地就罷工絕食俾我睇, 以死相諫, 哈哈......,

另外見到熊貓鰍越黎越霸度去搶糧, 所以執起佢放左落番緊缸既細缸度清潔下先, 跟住D蝦食起白倉糧黎又真係暢快左喎!

重有尋晚又有一隻去左, 嚮D石隙度, 爭D睇佢唔到, 可能已經死左一段時間, 執起既時候見到背脊上面有D紅色血水, 同埋白色都已經退左一部份, 見到好透明既蝦殼, 同埋好蝦肉色既蝦肉, 咁係咪即係話水晶蝦既紅色同埋白色, 係隻蝦吸收到D咩物質之後才制做出黎呢, 至於果D物質又係咩黎呢? 紅色= 鐡(波菜)? 白色 = 鈣(鈣水)? 真係不得而知了 

漁夫之寶～膠蝦二號

上環豪哥有新貨番，第一時間標去揀，呢次仲好鬼多乸，自己對禁入情有獨鍾，真係又一次多謝豪哥割愛，就係相呢件索野喇，真係深深俾佢吸引到，因為有事在身，其他都唔再多看，馬上就tick佢番屋企，對左一分鐘水溫就放入缸了 .

有興趣朋友可以去睇睇，果度唔同街邊舖位咁唔歡迎小朋友架，因為本身就係買玩具同戰鬥咭既，不過我諗遲D佢都會立埋隔離舖專賣蝦了，哈哈。。。

 一號近照

泡沫豐富茶籽粉

一不做二不休，因為番缸前見有虫，所以就算換左泥都要澈底清清佢，尤其是呢個缸特別多橢圓形果D有殼虫，雖然無害，不過某程度上都阻住睇蝦，看官睇下第一張相，離遠影都見到有咁多點就知喇，絕對唔係你個MON有死點呀，戰虫經過40小時後都搞佢地唔掂，唯有茶籽粉侍候沐浴, 同佢洗個靚頭先，唔單止泡沫豐富，仲可以澈底杜虫添, 經過四小時既浸淫後，宣布全部被擊落了， 再次鳴謝馬兄既好介紹!

 

Cross mix party !

個人喜歡紅水晶蝦的程度需不至於瘋狂, 但自問也是一個狂熱份子，哈哈.....都唔知自己想講嘜，總之行親FS都會放低D，唔會只揀一個品種，只要睇得上眼，價錢又值既話都會買(大部份係實白既丸禁以上），但係絕大部份都係兩舊樓下貨仔， 即係響個大缸度尋寶果隻，不過都買過一對剛好四位數既中年海老, 揀到正既拎番屋企就會即時影張相留念，因為怕佢唔鍾意新環境，第二朝就死俾我睇.

有人響往純血，只養一個蝦種，而我就鐘意玩大兜亂，因為每種蝦都有各自既特點，如果純血實白血爪靚花，紅白分明既純種蝦, 往往要動輒昂貴金錢，更因為貨源唔多，有近親相交弱化基因既可能性，只要無白蝦基因，任何不同品種相交繁殖出黎既仔女就唔會有白蝦出現，但係源頭分散的話都有風險，就係出左白蝦就會唔知邊隻出事, 查實講到尾只係自己付擔唔起, 哈哈。。。。，再者生出黎既子代唔會有大驚喜, 因為同一個子代隻隻特徵都會差唔多，再打出黎既亦都會差唔多, 而不同品種mix出黎既B，因為你唔知佢地邊隻佬得左米先, 要睇住D B慢慢大先至知，吖！原來佢亞媽係邊個邊個, 佢老豆係邊個邊個，好好玩架。

我就喜歡以中年海老爲主，去溝不同品種,  因為中年海老人地話會大隻D(其實可能係傳聞），咁即係體格好D啦，以下係我所買過不同既蝦(多數係乸），有紅蜂，貴夫人，錦蝦，博多，漁夫之寶，遲D再post佢地既子代俾大家分享，睇下認唔認得出佢地係邊個品種既子代＾＾

種缸三個月後大清洗

持續死蝦, 需要澈底清清佢, 半清缸行動昨晚開始了:
執起所有野, 剩番棵樹，氣頭，水妖同泥
100%換水，洗環，加戰虫x2粒

10分鐘後見到有兩條成寸長既虫爬上缸邊，色似渦虫，但較幼，無三角形頭. 爬至缸頂就瓜左於水中飄浮，真係多謝Happy兄既好介紹。

等聽晚再換100%水之後度數據才落番蝦，上一輪既生仔潮，活存率仍然偏低，至今粗算只有三成左右，日後要改變策略，把就黎生既母蝦放回大缸生，應該會提升到。

昔日境況希望盡快重現啦!

懷念同你走過的石春路

啱啱養蝦時，咩都唔識，只要靚就得喇，記得同老婆拍拖時響內地行過一條用石春舖成既路，所以第一個缸就舖左出黎，仲用五顏六色既添，不過最後因為被泥遮了，又怕會出鹼性出黎，所以就執起哂，真係值得回味架。

   

拯救小孤初

母蝦不知是否因初次做媽媽關係，有產前抑鬱症，劈低12粒左右既BB蛋就走左，唯有挑那卵落蝦網仔度搵水吹住，希望佢地孚得到出黎啦！跟住第二日又死左隻生緊仔既靚媽, 一齊同期執行。

兩日後，靚媽既遺腹子卒之有隻誕生喇，其他有幾隻彈唔出焗瓜左。

換水必用

小弟雖養水晶蝦只有一年多，日常管理方面始終係仍在摸索中，因為每人設備不同，家中自來水又不同，所以要找到適合自己個缸既管理手法，真係一門好高深既學問，現在平均一星期一次1/6換水，要看得唔得閒，最多兩個星期都試過，因為大廈洗水箱，自己又懶落街買蒸餾水，果期又無死咪ok囉。
講番用品方面，我自來水會經Doulton直出水桶，然後直車入缸，跟住加希瑾微量原素至Tds180，另加10ml硝化菌，一個月加三滴黑水和三滴SMW. 其實呢各3滴只不過係買左唔好嘥，寥表下啫，因為曾經加過出事，諗起都驚。

番缸必備

相信很多人都會爲番缸（or開新缸）頭痕，吸泥吸水固然辛苦，但係跟住揀泥、檢疫同埋等爆NO3才是最重要，泥唔酸養唔到蝦，因為高過7會易高NO3, 咁D蝦就唔襟擺，最穩定又多人用係ADA泥，通常係粗泥底幼泥面，至於酸唔酸可以落之前用筆試下先. 其次係檢疫，個人建議可以響落泥後頭果兩日落茶籽粉，將所有野放哂落缸浸（除左生物），以浸到D水白哂色爲準，如果用下圖果隻，一盒廿蚊有6包, 一包份量好多，所以唔理咁多，成包落楂兩下練兩下就好快白，跟住包野就抽得起上呢架喇，第二曰就100%換水，第三日又100%換水，順便將D泥粉抽走麻，跟住D水就好清架喇，同埋日後只要落糧唔好過量，有野死左就要即刻執起上來，咁d渦虫就唔會出現或者遲d先同你見面架喇。

最後階段就係要等爆NO3喇，因為有NO3高會好易死蝦！所以先至會有人發明吸NO3包，就好似API呢隻，我個種缸同大缸都係靠佢開，正常用ADA泥的話，第8-10天(包括兩天浸茶籽粉)左右便會開始爆NO3，呢個時候便可以落呢包野(或第3,4日落定先也可以)，如果番缸原用舊桶舊環都可以幫手頂得兩咀，不過始終蝦同泥係最接近，如果唔小心處理，呢個時候落蝦，死傷就在所難避，不過忠告一句，落了包野也不一定好快控制得到，只可以叫做幫下手啫，新開缸就最快大概兩星期後，No3爆完先至好落蝦會安全D。跟住再過一排就要抽走揾水浸住，試下個桶一兩日後掂唔掂，如果唔掂, NO3升番就要放番落去，一路keep住加菌，然後過幾日又抽起睇下, 直至個桶N-CYCLE運作完成, 無NO3後便可以掉左包野, 因為包野都有使用限期，好似係兩個月，不可以長期依賴的，不過曾經有師兄用左超過半年都無事, D蝦亦都好靚, 但係就唔知包野真係咁勁，定係包野已經失效, 個N-CYCLE掂左喇。

漁夫之寶---膠蝦

朋友介紹在上環的店買蝦(漁夫之寶)，蝦乸1.4~6cm，應該仲係Vir. 好實白，花紋清晰，相片是剛剛對溫10分鐘後落缸影的，紅腳退左少少，受驚表現，六小時後出番哂，價錢相當超值，多謝wai ho兄廉讓俾我, 我會揾班俊男去照顧佢喇。Hehe.....

脫左殼嚮度損手指

突然番缸哩咁Hea

2013年5月--- 話說用5舊水入了一部二手e仔2073，賣家說只用了個零月，心諗執筍野，順便將部用了5年幾既jbl e900退役。把舊環換入，正常都會有D氣，咁我就死命，㩒左二百下左右仍然行唔到，爲有灌水排出氣，點知一行到桶後有好多白色片狀流出，睇見D蝦食左一啖後彈開，仲e牙鬆摃，係咁抹咀，心諗呢次大劑，好在剛剛開左個14“新缸，就拿拿聲畢哂D蝦過新缸，最後慶幸只係有隻成蝦轉唔到水瓜左啫。請教高人話係水冷管內積聚的亞摩尼亞結晶。呢次真係“羅友恒“喇@@

分享加泥好方法

終於有朋友讓左半包幼泥俾我加入缸，但係又怕D泥粉飛到成缸都係，所以諗出一個方法，效果好好，首先倒滿泥落個密實盒到，然後加滿水，把蓋冚好，但千萬不要冚實，然後倒轉放入魚缸內，把蓋慢慢打橫移開小小，讓泥慢慢流出至理想位置，因為盒內沒有空氣彈出，所以就不會做成震盪，泥粉就不會周圍散開，夠了便冚實盒蓋，慢慢抽出魚缸，大家有需要加泥就可以試下這個方法，去片....