《雪花蝦糧》

最近臺灣吹起一片神秘蝦糧熱，呢隻糧係由一位權威繁殖家試用後，講到好好咁樣，加上落水後會好似麥莖菌咁散開一片片白色半透明好似雪花咁既薄片狀物體，所以被譽爲《雪花糧》，引起果邊個個同業都紛紛打探呢隻蝦糧究竟係何方神物。

原來香港同大陸都無得買，只有臺灣中部一間廠一大袋50kg咁賣，亦有一些人想到散裝一包仔一包仔咁賣俾蝦友而發大財，但係相信呢個秘密將會好快不會再係秘密了，因爲連我這個無名小卒都知道了，響呢度我都想賣個關子先，哈哈。。。如果買一大袋真係可以俾我D蝦食幾百世，自己食埋一份都食唔切呀！

我地幾個師兄弟都想入番D黎試下，希望不久既將來會有包膠俾大家知，又或者遲D香港都好快會有人賣囉，值得大家密切留意＾＾

交流分享最重要

記得兩年前第一隻水晶蝦就係響呢段啱啱轉凍既時候買，當時仲有養極火，黃金，橙蝦，大和等等，最終都係選擇只養紅白水晶蝦，因爲顏色同花紋都好靚同埋隻隻都唔同樣，真係好吸引。

既然佢地咁靚，咁當然亦都有佢地既特別高要求啦，所以每日我一得閒就會爬文，遇到唔識或者個缸有問題既時候都會上網嚮討論區度問D師兄前輩，雖然有時會有好人既師兄回覆解答，但係亦都有會石沉大海，當自己對住個唔知有咩問題既蝦缸，無人幫到自己既時候，D蝦又係咁死，果時心情真係好down架！問更深入D既問題, 有D師兄就更加答都唔答, 例如我果時好奇問D大大點解要加塊板響缸面呀？點解你D蝦D腳咁紅架？你餵咩野糧呢？(原來答案係要睇蝦既品種, 餵咩都幫助唔大), 點解你蝦缸要加CO2架？等等, 等等......可能係我真係問得深入左，又可能D大大覺得我問得好無聊就唔答我，所以我而家先會寫呢個blog，希望可以幫到初學養水晶既師妹師弟，哈哈。。。發揮“人人爲蝦～蝦惠人人“既精神，如果一早有睇開我個blog既朋友就知道，以前我寫的大部份都係寫蝦缸既用品同埋設置(哈哈.....因為果時D蝦真係唔見得人), 目的都係想分享我既經驗, 俾更多人知道養水晶蝦既樂趣.

其實我就覺得多人識養，多人一齊交流下心得先至會開心，一個人自己冚埋門，就算你養到D蝦識飛，也都是自己一個人欣賞，倒不如互相交流，互相學習，互相鼓勵咁仲黎得開心D啦！大家認爲係咪?

我的第一隻20蚊靚蝦, 係咪好似貴價既"花式虎"呢^ ^

嗚......... 第一次心痛的一刻  T_T

淘汰缸首影禮

從上個月開始挑蝦，超過三分二既蝦都挑到14"缸入面，比例真係咁高？定係自己要求高呢？我諗係後者掛，記得以前第一次接觸喉糖既時候，果份膠蝦感覺真係難以形容，見唔到中間條黑色蝦腸，好似塑膠啤出黎咁，單單呢份表現就足以令我迷倒了。

雖然而家個淘汰缸話就係話淘汰缸，不過全部都有膠蝦feel架，大部份養到1.34了，今晚趁得閒就部左好耐先影倒D清晰D既相俾大家睇，因為用手機影，如果D蝦一郁就會好矇架喇。

護目中空板

近來發覺LED光看多了都幾殘眼，對眼睛健康唔係幾好，尤其係對小朋友，因為佢地既高度較低，比較輕易照到眼，所以我用左15蚊響文具舖買左塊黑色既中空膠板番黎，用魔術貼貼上木架邊上，效果十分好，自己賞蝦既時候眼睛都會舒服D望耐D啦，最主要係希望大家在享受之餘都要關注家庭成員既健康^^

候任種公選拔賽

經過初步篩選，頭呢轉已經挑出五隻候選後生俊男，而家就遂一介紹一下，如果你係我，你會點揀呢？

一千零一隻白驅公(剛脫殼)

好紅既紅腳（不過手機影唔清楚）

丸仔小白臉（有D乸乸地）

對稱禁入花

紅唇厚甲公

黎多張，佢就係我既大熱之選, N N.

心情手記

我諗大家養蝦目標都係同我一樣: 1) 唔死蝦， 2) 爆到蝦，3)挑蝦，4)再爆靚蝦，本人慶幸已踏入第三階段，但要想挑狠D既同時，又要把丸禁級既蝦讓出俾蝦友，心情真係有點那個，尤其係幾日前將D挑好既蝦放入生仔兜內, 準備影相俾蝦友睇時, 點知新環境令到佢地受驚, 不停咁搵窿娟, 游兩寸又停一秒又游兩寸又停一秒........ 這情況持續左兩日都無變, 本來想近D影清楚D, 點知搞到影唔到相俾幾位已聯絡好既蝦友, 在此先道個歉先, 希望你地會睇到呢個POST, 同埋理解到我既情況, 我會盡快再影過俾你地睇架喇.

無辦法之下, 唯有拆番個生仔兜出黎. 最後終於都作出左個決定, 就係將放嚮細缸玩緊溝蝦既其他蝦放走, 用個細缸黎養晒淘汰喉糖, 咁樣佢地會舒服D, 同埋避免溝到其他唔同既蝦. 保證血統不被影響, 維持喉糖既特徵.

咁好環境都炸型? 真係難服侍!   

感謝好友承接為淘汰而淘汰既靚蝦 T_T

CO2分叉咀＆微調器

一不做二不休，既然搞得個氣泵微調咯，就唔爭在搞埋個CO2，因為一個樽俾兩個缸用，得一個錶俾大缸用，個細缸就咩環境都唔知，只係用兩個膠夾去死夾條CO2喉，好叉難調，個霧化器出CO2時有時無，時多時少，影響到個PH差距可能好大都唔出奇，咁D蝦就唔慌唔爽喇。

今日趁行開廣東道買野就順便睇下有無又平又靚既微調閥，最後都買到，一個分叉咀，兩個日本微調閥，一條10尺高壓膠喉，一共都係136蚊，響魚街賣緊好似一個微調閥都要成200左右喎。

番到屋企清洗下浸下水之後換上，效果真係唔錯，咁我以後又驚少一瓣咯，呵呵呵……

氣量調節器

好多時養蝦都會加氣頭水妖同埋底抽等等, 但係氣泵就通常得一個兩個, 咁就緊係正常去買D分氣喉咀, 加下調節閥咁樣, 但係唔知大家有無遇上同一個問題就係調大呢個出氣頭既時候, 水妖又唔夠氣, 調細個水妖，果氣頭就爸把聲標哂D氣出黎。

今次介紹呢個調氣排咀就可以解決呢個煩惱喇, 又型仔, 不過就又係貴少少, 要50蚊一個, 用法係先把水妖閘制調到最大, 然後把氣泵或者底抽慢慢扭大直至適合為止, 因為有個圓形氣鼓做緩衝，所以每個咀都可以獨立調節而唔影響到其他氣咀既流量，就算有都唔會好誇張，效果好貼心, 隨心所欲, 仲可以用盡個氣泵添，如果大家都有我呢種煩惱就不妨投資試下.

FYI.師傅教落氣無話打多，只有唔夠，仲可以做流，減少死水位出現既機會，有左呢類調節閥，氣泵買大D都唔怕啦＾＾



另類椒毒

前兩日又行過魚舗, 無意中見到嚮最上面果缸草，最入邊有兩大棵椒草, 紅色葉底幾正下, 要黎襯蝦仔, 吸下NO3就一流喇, 不過可能位置唔顯眼, 插左好耐都無人要, 所以不單止有成20cm高, 仲生哂黑毛同藍綠藻, 放入缸之前清理既時候，仲見到有條蝸虫添, 好彩好彩....

Update子代情況

依家大約生左一百隻蝦B出黎，一半已經1cm左右，都有好多好野，佢地大部份都遺傳到喉糖既特徵，開始有厚白既表現，而呢個就係我玩喉糖既原因，每脫一次殼都會厚D白D，到成蝦之後就會有厚白無縫既表現，首要都係配合水質環境既，所以每晚賞蝦同埋伸隻手去左搞右搞都成為我既生活習慣，睇住D蝦慢慢變靚，成日都會有新驚喜，真係百看不厭，咁當然亦都會有淘汰級既B啦。

呢一代我想挑狠D，遲D蝦B大左之後，我會睇情況讓D出黎同大家分享一下，實行恭諸同好，暫定大概係一隻丸禁級送兩隻0.8至1.5cmV仔/虎牙或者圈仔幼蝦咁上下，但求各位Blog友都可以同我一樣感受到玩喉糖既樂趣，有興趣既朋友可以click右手邊個facebook圖案加我成為朋友，然後send個 PM俾我，大家溝通定先，大約遲多一個月左右，到時大定左有1.6cm左右成左蝦就通知大家，Send 相確認後約交收。

PS.我仲發現到有五六隻BD甲係象牙黃色，應該係超級厚甲既特徵先兆，係就保祐你地快高長大喇＾＾