中椒毒了

不種不中還須中，早前同自己講千祈唔可以用椒毒，因為可能會比買蝦仲要敗家，幾個頭既靚品種分分鐘就要你成千銀，唉…… 但係最近C02做義賣，心諗幾拾蚊棵使得幾多丫，所以就買左三四棵super co2番黎，望下望下D藍色起曬出黎又真係幾鬼靚下，所以今曰最後一日義賣又走左上去買多一棵，點知響度睇下睇下又一棵，再眼下睇下又一棵，前後一共8棵，有D仲係貴野添，真係中毒了！不過又可以自己紮，就真係幾好玩架，以下全部都係出自我既手筆，係咪幾有天份呢，哈哈……

新一代提純了？

之前講過最近一代出左好多，眼見起碼最少有70隻以上，最特別既係有大部份都好似餅印一樣，特徵係有後枕，禁入同埋比較白，唔通呢次真係掂左？推算應該係有一批被提純左，唔知係母子定係父女搞埋左，我個種缸都係淨係挑起D唔靚既公去繁殖落去，公就只留低D禁入同埋白驅，所以今次出到批高質既B都唔感到意外，叫做有D成績睇下啦。

DIY小玩意

由於小弟工作關係，所以可以做出不同形狀既膠片，呢個水晶MOSS屋就係我自發研製，除左可以自己玩砌 3D puzzle之外，仲可以不需打結咁用魚絲綁上莫絲屋頂，乾淨利落，靚到呢。

放入缸之後D蝦就慣常響新莫絲屋頂上亂爬，有D就行左屋入面行個圈又出番黎，真係幾盞鬼呀，唔知可唔可以做黎賣呢……^ ^

重生樹

早期絲藻泛濫, 而家慢慢回復當中, 但係珊瑚莫絲樹仍然謝謝地, 所以把心一橫將珊瑚莫絲除下, 換左塘邊蘚上去, 效果都唔差喎, 而珊瑚莫絲就已經作另外用途, 試下自己設計玩d新野, 請密切期待 ...... 係一樣好正既野, 已經做左出黎 遲D再post俾大家睇.

廿分鐘紮一棵樹

塘邊蘚經過幾日測試後，發現可以接受浸水養殖，附有的泥更是蝦仔喜愛的食物，終於昨天開始紮樹給fd，因為時間問題，用我最快速度，用左20分鐘便完成5個葉球既松樹造景，大家睇下手工如何？呢隻蘚真係好有層次，要黎做呢隻樹景真係合適，呢棵野紮完出黎本人覺得好有氣勢，好似聶風楂住把"雪飲"咁，正所謂寶劍贈名仕，名樹亦都有主喇，Happy兄請自取，Hehe.....

執到寶

早前見到位C兄買左一條超迷你鳳尾苔紮木，非常之靚，友情價都要3xx，本來都想買番條，可惜我無空餘位置，所以打消呢個念頭。

不過話說過年到老婆外家門前魚塘邊睇到有類似既呢種苔，份量仲好多添，真係連個天都想我種，哈哈……我緊係唔執輸鏟左D番屋企，而家揾個月餅盒蓋放響蝦缸燈下面照住，遲D會用黎紮D樹型木，要黎送禮自奉皆宜^ ^

欖仁樹枯葉

時常都聽人講話蝦缸唔夠酸，可以用欖仁樹枯葉放入缸內提升酸度，碰啱一個星期前響馬鞍山公園近洗手間一棵欖仁樹下執左一塊，回家後浸左水一晚，第二日度PH就由7.5跌到落5.77，效果真係好正面，但係爲左想試清楚，所以就再想換水浸一段長時間，又碰啱我要陪太太番回外家過年，經過6日之後，今天回家再度一下，仍然係5點幾，這樣代表欖仁葉真係可以制酸，我亦都見過人地買現成既放入缸內，都可以當成蝦既食物，但係我唔知D公園種既植物會唔會有農藥，最終我都唔夠膽去搏。

PS... 如果大家真係想試下放入缸，建議最好要看清楚葉既形狀，浸佢幾次，換多幾次水先至好放。

新年新世代

農曆新年呢段日子有幾隻蝦乸都生左蝦B，有一兩隻即時再抱，有D就要抖抖。

而莫絲高鉄橋就成為了蝦B既理想棲息地，佢地選擇匿響度就唔會被襲擊，更加唔會餓死，因為莫絲表面提供到足夠既野食，到佢地自己認為夠料就會落山架喇，當然都會有幾隻初生之犢唔怕死一出世就大搖大擺咁通街行.