CRS FunLand: 9月 2013

2013年9月29日星期日

蝦糧選擇及介紹

講到蝦糧想必各位Blog友都係同我一樣買買埋埋一大堆，呢樣試下果樣又試下，掉粒落缸，食就餵多幾次，唔食就劈左佢或者放埋一邊，總之放到無地方擺喺喇。

衆所周知蝦係雜食性嘅，我成日心裡面都當佢地係水中既曱甴咁養，所以各式各樣既糧我都會買，直至而家試左十幾款，現在會餵既就得番幾隻，在這裡就同大家分享一下用後感同埋好壞處啦。

KU菌: 本身係要黎新缸養菌用的，但係我就經常當糧咁餵，蝦就非常之鍾意食，更可以提供俾蝦B食，提高活存率，安全有益，唔會out虫惹藻，投放程度60%

銀色白倉糧: 相信係最多人採用既糧，蝦都幾鍾意食，我網上發現原來呢隻糧係少有標明含有幾丁質既蝦糧，而幾丁質就係蝦殼既主要成份，或有助蝦殼成長，投放程度20%

波菜: 自己揾D有機的，嫩口細細棵，洗乾淨烚熟去都可以，但係我就去水記買有一包包急凍日本進口現成既去餵，買一包有排食，又係安全衛生，投放程度5%

蝦寶三合一: 響上環豪哥度買，出面魚街都好似無得賣，每次用一小落水攪混，然後撞入水缸，均勻散播每一角落，可以俾蝦B食用，投放程度5%

日之丸Quatro2: 含較多植物成份蝦糧，綠色包裝，大大條，可以一開三次咁放，呢隻糧有樣好處，就係堅硬無比，好襟食，蝦又幾鈡意食，可以放水中成日都唔會散，即係少D對水污染啦，最重要係唔使執，D蝦始終都會食哂，投放程度5%

紅金寶: 呢隻雖然係唔出名既台灣蝦糧, 但係我見到佢既成份裡面有50.3%係蛋白質, 所以我就要黎谷卵用, 唔知係我心理作用定係真係咁有效, 母蝦食左隻隻都抱到滿晒, 就算死蝦期都仍然係咁抱, 不過要注意隻糧比較細粒, 同好易散晒, 即係對水質都有一定影響，投放程度3%.

微生元素: 呢隻粉好肥，含多種微細營養，提供蝦B所需養份，每當我見蝦B存活率唔高或者成蝦唔多爬泥既時候先至會落，都係開水攪混倒入缸，會好似楜椒粉咁好難溶落水既, 唯有攪耐少少. 切勿大量，會影響水質，及吽虫出黎，投放程度2%

2013年9月23日星期一

強者殞落

呢隻係我第一隻養得最長直至老死既蝦:…中年海老公，身長2.5cm，眼睛泛紅色，厚甲實白，紅腳，係響水記買，買時已經有1.5cm大，養左一年左右，估計是陽壽已盡，畢竟大約15個月應該有了，安慰是子代亦都唔少，因為佢曾經抱住隻飛蟻黎食，所以特別認得佢，果陣時都曾經當選過種公一號架，hehe.....

佢既case係退殼後，鬚再長不長，不願有太大既活動，大量減少進食，爬泥情況也少左，一星期後漸漸又出現頭頸部分有離殼情況，好似脫到最後一件底衫咁，露出蝦肉色既蝦肉，最終延至三天後既今日早上卒之瞓低左，所以藉此懷緬一下佢............

2013年9月22日星期日

貪得意問魚店老闆借左部ORP儀錶玩，攞番屋企度下缸水靚唔靚，以我所知個錶多數係用響鹹水缸，要黎控制臭氧既釋出，從而提供好氧菌活存環境去調節水質。

自己之前玩鹹水既時候都無玩過咁高程度既野，淨係搞好個水流，唔換水，幾年先至輕輕沖下D環，卒之就俾我符碌咁玩左七八年，所以呢次都係我第一次用呢種儀器，咁就當然要上網爬下文啦，原來ORP中文解釋係“氧化還原電位”，單位係mv，正常既好氧菌生存環境係300mv以上，而厭氧菌就係100mv或就算負數都可以。

試左結果係水喉水最低，不過都有434，個新開間中打氣既養泥水缸有495，而NO3係0既大缸就有成523，我唔知523係咪叫好好，但係就可以理解成多打氣既缸，含氧量較高的話，對好氧菌(水質)就一定有幫助，用呢個錶就可以監察同推算到N cycle既運作情況，從而可以在惡化，即數據續漸下跌時加大打氣或決定是否須要洗桶或加菌，有錢唔置在既話就不妨插多個錶，不過作用就真係唔大，因為養蝦就長開大氣，直接經常睇NO3就可以喇。