新年快樂！

新一年祝大家新年進步！身體健康！新手變老手！靚蝦長養長爆！

今早起身一睇個blog，剛好見到瀏覽次數係五條煙，所以即時copy左佢，對我黎講都好有意義，因為係代表我D post有人去睇，可以幫到新手參考，幫到人之外，都可以給予志同道合既朋友做一個交流平台，互相分享互動互動一下真係好開心呀！

淘汰中的淘汰

爲左保持喉糖既質素，我會定期將淘汰缸裏面最差的一些蝦的番公司個四尺缸度養，當做益下老闆，又可以提升自己D蝦，今次就挑左以下既13隻。

同場加影靚乸一隻^^

F1 的 F2

F2已經出世喇！表現如何？都係要繼續挑囉，不過都有出位既，希望我可以一路狠心落去啦。

亂咁餵?

自從餵左條不知名白虫之後, 跟住就控制唔到自己, 成日都諗下有無d咩野可以俾蝦食而又唔會壞水既呢, 早兩日試左紅虫, 都係像徵式幾條就算, 無留入雪櫃, 因為真係臭到冤!

而尋晚就餵左即食麥皮, 一片仔試下, 初初無嘜反應, 但係慢慢就有蝦搶, 都爭得勁架, 估唔到d蝦真係嘜都放入口, 下次試下花生同黃豆先, 其實我係响到試緊咩食物會對蝦既顏色表現有幫助, 不過好難推算同統計....

後顧之憂

爲左避免成日驚D蝦會匿埋一二角死而吽壞水，有個位我成日形住會有機會D蝦響後面死左而睇唔到，所以就今因黎個了斷，呢個位置就係響太古海泥後面喇，大家睇下我點搞……正中90度架，而家就真係無後顧之憂了，爽！

喉糖的白

剛剛被大C兄whatsapp張蝦球相黎刺激到, 佢係一位忍士, 好少嚮網上面D討論區出POST同出相, 佢呢次挑完蝦之後D級數簡直係靚爆鏡, 挑得真係幾高水準架, 再睇番我D蝦就只有實白表現, 睇黎我都要努力加油先得喇! 我要超級紅虫腳呀!!!!!!!!!

得到大C兄首肯，給大家欣賞下佢既成果^ ^

以下係我而家大缸既蝦



很糟糕的淘汰缸

成日都會聽到蝦友說: 死喇! 我個缸爆C藻呀！我個缸爆黑毛呀！我個缸有好多蝸牛(扁卷)呀！…… 唔通連個天都唔鍾意我……等等，等等。

其實咁又有咩可怕呢？只要唔影響到水質，唔會死蝦，都係天然野黎啫，咪話之佢爆屎渠啦，好似我以前咁手痕落下藥，炒缸反而咪仲幣添，你話啱唔啱？大家睇下我個淘汰缸就知我有幾糟糕架喇 (反話) ^^ 哈哈......

黑毛綑邊大椒草

似未炸臭豆腐既蒙脫石

C藻樹造景

超變種8mm扁卷

又係綑黑毛邊既鴨咀出水

腐爛左既浮萍

32L水養接近一百隻既淘汰蝦

我的換水方法

其實換水既方法每個人都會唔同, 自己覺得D蝦精神就OK了, 而我就係隔大約一星期換大約20分一水, 每次就係抽一小桶咁多, 水係經兜盾濾水器過濾, 倒入膠桶打氣養水至少一日至用. 加水入缸後就落希瑾調較至180-190之間, 最後就係落硝化菌, 搞掂.......

PS.: 每個人既缸大小, 養蝦數量, 水源同蝦既品種都唔同, 大家要觀察自己既蝦缸情況而調控管理方法, 以上只作分享參考之用, 切忌搬字過板 ^_~

  

繼續補下企

入冬後真係無暖過，響街企多陣都會變雪條，至於屋企果兩個蝦缸，大缸就開左暖管一段日子，維持響22度左右，而細缸果支50火唔知係咪壞左無著，溫度就低到去17.18度，雖然係咁，細缸既狀態仍然係好過大缸，大缸響入冬後反而死左兩隻成蝦添，真係唔開好過開，另外一個原因唔知係咪細缸有俾過蜂蛹同埋兩條不知名既白色虫，D蝦進左補所以身子好D呢！有見及此，我準備將大缸支暖管慢慢調細至熄左佢，因爲蝦始終都唔會點驚凍，如果暖管著下熄下咁可能會仲衰添。

早兩日行開魚街見到有間舖門口放左一兜兜既麥皮蟲，12蚊有成百幾條，問老細佢話係俾蜥蜴同變色龍食既，絕對無添加，安全衛生，心諗又可以俾D蝦仔補下喇，番到屋企之後就揀左一條最淺色既有成寸幾長，將佢一開四放落細缸俾D淘汰蝦食下，諗住試左效果無事先至俾大缸D種蝦食，點之第二日換水就發現加水時沖起左好多白色點點出黎，應該係麥皮虫D粒狀脂肪物體，我無理佢，同平時換水模式一樣，換完不久之後D水又清番，時運高，希望之後唔會壞水啦……