有些blog友問我究竟渦虫係點會出現同埋點樣預防，有人會因為困擾一段時間後，而因此番缸，但係番缸後唔夠一兩個月又見番佢地出現同你Say Hi. 咁又真係幾煩架，初學者分分鐘會就咁而真係放棄養蝦添，這次就等我分享一下我既經驗同日常預防方法啦，都係果句: 純粹分享，不喜勿插！
1) 自來虫: 有時買番黎D草草木木，莫絲浮萍，店主都會唔問你要唔要就送埋D渦虫，扁卷同蝸牛俾你，咁你就唯有要用水沖下浸下，睇下D根睇下D葉會唔會匿埋左D渦虫響入面，沉木就最好用熱水浸佢幾次，我呢條高鉄路軌我要玩幾次巴黎鉄塔反轉再反轉先掂呀。
2) 吽出虫: 大家通常見到D蝦響泥面度爪黎爪去都會以為佢地好肚餓，成日餵極都唔飽，其實佢地只係食緊泥上面既微生物同埋藻苔，呢D營養係佢地必須既，而且普通蝦糧裏面都未必會有呢D成份，但係我地就會誤會佢地仲餓，不停咁投放蝦糧，令到有好多殘餘跌入泥入面而吽出蝸虫出黎，尤其是過量既微生x素，而我就會用個兜裝住俾蝦食，不過有時佢地有時都會擔出黎食，咁就無計架喇。
3) 裝下虫: 每日我都會水平掃描一下個泥面，同埋我佈置到唔會有盲眼位，咁樣除左可以睇下有無殘餘蝦糧之外，仲可以睇下有無死蝦，一有發現就要馬上執走佢，如果唔係就會好快爆出虫架喇，信不信由你。
4) 吸虫器: 因為渦虫會係響泥入面周圍捐的，所以你唔會咁容易發現到佢，就算見到佢響泥面，有時你都會束手無策，夾又驚佢斷，斷左就會一分爲二，撈佢又會縮埋一粒跌落泥入面，因為咁我就設計左個吸虫利器(攞佢命四千)，係利用一個較爲硬身既茄汁樽，主要係要揀蓋無漏氣的，禁扁放手後只會從樽咀入回氣, 並有快速脹回原狀功能，利用一段軟氣喉仔將樽同埋硬幼管接上，放管入水前首先要把樽內空氣迫出，禁實固定樽身，然後把硬喉咀放近渦虫，對準目標後將禁實樽身既手完全鬆開，咁樣渦虫就會被吸入樽入面，大功告成！不過每一下只吸一條虫，太多虫就要用之前post左既吸B方法了。
近排D蝦好鍾意上條架空高鉄(莫絲木)上面揾食，碰啱一隻開缸功臣之一，大老母蝦西起個頭揾食，應該有接近一歲大了，因為佢大肚臨揼仲做埋D危險動作，拗住條腰抓莫絲，都幾驚佢拗柴啊，所以即時影左佢，呢胎應該係第三胎了，D仔女都長大成蝦了，恭喜您＾＾
小弟挑蝦中，有興趣既朋友可以按facebook發個訊息俾我。
今晚番到屋企除左鞋，例行公事就緊係望一望兩個蝦缸，點知被我發現左有條唔知咩蟲響個細缸入面飃下飃下，有成1.5cm長，唔通真係天降肉虫俾我D蝦補一補？紅紅既臉龐，雪白既肌膚，又幾靚喎！正所謂，白白淨無勝病，心諗以前我隻死鬼海老公都食過飛蟻啦，所以就把心一橫諗住撈左佢出黎加下工，點知原來佢已經香消玉殞，反魂無術了，咁我就更加安心去做呢項物盡其用既環保工作了，咦...咦...！都幾搶口喎，唔知究竟係咩虫黎呢？功效又及唔及得上蜂蛹呢？咁就要下回分解喇。
鳴謝Happy兄今日分享佢撲番黎既雪花蝦糧俾我，幾個C兄弟每人分得十零粒咋，真係好珍貴呀！
先試爲快！一番到屋企第一時間就掉粒落種缸先，初初無嘜蝦行埋去食，過左十分鐘之後睇番，反應都好好喎，仲Feel到D蝦食得好開心添，一個字“Yummy“＾＾
兩個鐘後，仲食緊！？都幾襟食喎。
昨晚經過大圍，由大圍站行去一間賣中年海老既蝦店睇下，一早都知道有呢間店響度，只係無時間去。地點都算方便，但係唔識路，只有打電話問路，在老細引路之下，好快就行到了。
曾經也是中年海老擁躉既我，看到6缸左右既海老，當然係左睇右睇啦，果然有好多好野呀，可惜自己而家專心爆緊喉糖，比著以前就一定尋下寶，起碼撈番一兩隻番屋企玩。我唔好意思搞搞震無幫襯，最終都散買左兩粒大礦物球，不過唔知咩效果，都係放落淘汰缸玩下先，另外仲有買左四隻長鼻槍蝦清絲藻添，佢地都幾做得架。
雖然我一隻海老都無買到，但係呢個老細一D都無炸型，大家傾下蝦經，不知不覺都過左食飯時間添，好彩大人無扭耳仔啫＾＾
