久被遺棄的細缸

今日望下個14寸細缸，原來D絲藻又爆得好勁，用手清咁D之後影番幾張相同大家update下先。

呢個缸番左缸三個幾月，用氣舉底抽直入背濾潛水泵上電子水冷回缸，呢個setting係搞盡腦汁咁諗出黎，因為無位放濾桶，所以唯有咁樣試下，雖然我已經做大左個後隔，放左6L monoball，結果NO3都係長期響20至30左右，但慶幸D蝦總算都叫做捱得住。

我係用呢個缸要黎玩溝蝦用，住客有以前養開既海老，錦蝦同新加既博多乸，佢地已經出左F2，而家仲放埋喉糖既淘汰公同埋淘汰B，好好玩！希望可以繼續挑，遲D出到D段段有既子代啦！

F1海老公

淘汰喉糖公

新入博多乸(已被喉糖公搞掂)

蝦公狂想曲

唉… 成日望住個缸，總會睇下D公既最新狀態，睇下D色有無靚到，有無白到，或者D腳有無紅多D，希望爆出黎既蝦B會靚D，但係佢地始終都係唔爭氣，自己又唔捨得動輒幾張金牛去換隻靚靚喉糖公，唔通真係要靠下圖呢隻靚蝦乸生番隻靚公仔出黎？

現任種公一號

1cm公仔，有待改進，加油！

蝦缸後勤員工（2）

呢次係介紹一種魚，就係叫做螞蟻燈，佢既工作係食虫，但係只限於白線虫同埋其他比較細size既虫，包括好細既蝸虫B，要黎預防都好架。

佢地唔係好大條，一般係1.2cm左右，性情比較馴良，唔會爭蝦糧，更加唔會追蝦B，蝦魚和平共處，唯一缺點就係好奀，好易瓜，不過唔緊要啦，8蚊條，仲有5送1添，響水渠道果間有得賣，左邊中間果行第三四缸就見。

我爆緊喇！

養左喉糖蝦大約有兩三個月，由初初接觸到找出適合佢地既管理手法，至今可以叫做有D成績，從最初第一胎只有三四隻既活存率，到而家維持到較高既七八成，孵出的大部份蝦B都能夠再脫殼成功，呢次可以說是苦盡甘來了.

今日又影左D蝦B相分享俾各位Bolg友睇下，留意下佢地真係細細隻都已經幾厚白下架喇，唔怪之得越賣越貴啦，我會好狠心咁挑落去，遲D如果有淘汰蝦既話，我都會平讓出黎，等有興趣同欣賞喉糖既Blog友都可以感受到佢地既特別之處。

限泥種限草

其實養蝦真係唔係幾適宜種草坡, 但係一塊成缸舖滿哂又真係幾鬼靚架, 以前都種過4種前景草, 第一次係種烏拉圭皮草, 一條條好幼, 又唔識插, 卒之插左無幾多, 之後D蝦又幫我摷哂出黎, 飄哂上水面, 第二次係迷矮, 唔夠光黃哂, 成功既就只有天湖茜同埋牛毛, 呢兩種草生長速度相當快, 唔使幾耐就生到成缸都係, 阻住D蝦爬泥, 泥同草葉之間又有好多暗位, 產生死水位令TDS好難降, 所以要忍痛掹草, 清既時候難免整起哂D泥, 令到D蝦中毒, 讓成大量蝦隻死傷, 自此之後就唔夠胆再種草坡了.

尋日行過魚舖, 見到有隻草冷地生, 高高幼幼, 疏疏落落, 幾適合種響蝦缸度, 問亞祥佢話叫針葉皇冠喎, 佢醒左6個<大>頭俾我試下種下, 回家途中, 心想如果又生到成缸係咪又捉虫, 最後諗到一個辦法, 就係用個矮身既透明膠筒框COOL住D草, 唔俾D草生出呢個範圍, 就好似藏左個透明花盤咁, 唔知效果會點呢, 希望日後會生出一盤好密既圓形草坡啦.

喉糖寫真

自己真係好鐘意紅白水晶蝦，尤其係喉糖蝦，佢既厚白無縫表現，真係可以用[膠蝦]黎形容，雖然腳就普遍無其他蝦種咁紅，而紅腳成蝦公就更加係天價添，咁唯有自己揾D紅腳既母蝦, 同埋買D有潛力既幼蝦公番黎, 等大左就自己打，希望有朝一日會撞到D好野出黎啦。

以下係最近影既蝦相，個人覺得毒性都幾高下，建議大家預先啪定粒喉糖清清喉嚨D痰，然後至再睇落去好D，Haha.....