交流的幸福

亞仔已入廠兩日，這兩天下午都早走少少去接我老婆更，佢就番去沖涼，跟下個女功課，而我就餓住個肚等佢番黎，亞仔而家都好番D了，響呢段無聊既時間，最好就係寫下Blog啦。

相信大家都或者知道我響早前開左個facebook 群組，叫做"香港水晶蝦會"，會員人數都有千零個，幾好玩架，成日都有新post同回應，大家可以交流之餘又可以講下笑，寸下潤下又一day. 嘻嘻哈哈咁……真係幾過引。

係人都知開呢D會係無錢賺，爲的只係想求大家開心下，我更加唔會諗話係自己有咩功勞咩號召力，其實大家咁踴躍參與，爲的就係想同多D師兄交流分享一下，而家有呢個平臺俾大家聚下又真係幾方便幾互動，一個字~爽！

在此要多謝我三位朋友，邦少，Chris同Happy幫我做管理員百忙中幫我抽時間住，爲左大家可以流暢地享受呢個平台，我地確實係好努力咁把關，我諗接近有30位老大都響群組裏面賣過廣告，每次都要PM通知佢地，叫佢地睇置頂文章，好彩佢地大多數都會明白我地呢個係純分享平台，最終都會手下留情唔會再出類似post，響度都要多謝佢地一聲 , Thank you all.....